Esta ye otra cueva que de xemés en cuando aparezme pel discu duru, nes poques neurones qu'entá quedenme sanes dempues d'una llarga y conocia vida crápula. Relativamente cercana a Avilés y n'una tierra que préstame asgaya como ye'l norte de Lleón. Munches vegaes tenemos falao de la posibilidá de retomar la esploración d'esta cueva, pero siempre surde daqué que nos emburria a dexalo pa otru añu, y asina va pasando el tiempu. Pero esti añu parez que por fin van xuntase les ganes de facer coses cola esistencia de meyores preseos pa facelo.
El Pozu l'Infiernu ye un pozu del riu Toríu que da nome a esta cueva que amesta les agües que surden d'ella al riu Torío, na estrechura de les Foces de Vegacervera. Estes agües desúmense nes fondigonaes del Valle del Marqués, siendo el sumidoriu más nidiu la Cueva'l Moruquin, a 1.590 m.s.n.m.
Esta cueva foi esplorada mentantu los años 70 de la pasada dómina pel Grupo Espeleológico Matallana, de Lleón. Tien un desendolcu de 530 m. y una fondura de -30 m., finando nún meandru torgau per costeros (nicios estrayios del Archivo de Cavidades Leonesas, Tomo I, asoleyau pela Delegación Leonesa de Espeleologia en marzu de 1983).En 1982, Carmen Portilla y Pepe Medina del STD entamen la esploración d'esta surdencia algamando alredor de 40 m. de fondura. Describen una galería franca de piedra prieto y agua daqué veyao.
El 5 de Payares de 1985 somorguiaronse n'esti sifón J.M. Gutierrez y F. Ruiz, del G.E.S. de la S.E. de Málaga, morriendo los dos nel interior de la galería. Nel llibru "Técnicas de Espeleobuceo", de Fidel Molinero y asoleyau pel Espeleo Club de Gracia en 1999, faise una descripción del accidente:
" Sifón con aguas excesivamente frias. La baja temperatura de las aguas pudo causar una hidrocución a uno de los buceadores, cuyo cuerpo se precipitó al fondo del sifón. El compañero, presa del pánico, debió intentar salir precipitadamente (chaleco inflado a tope) y fue a empotrarse en uno de los techos de la diaclasa inundada. La instalación, montada anteriormente por espeleobuceadores del antiguo club STD, era correcta".
Anguañu, a fecha de 7 de Setiembre de 2008, nun hay más que cachos de llinea rotos pel sifón.
Esti dia aprovéchase pa reparar la pasarela metálica y montar una tirolina pa carretar material de merguyo dica la poza'l sifón.
